Ayeri tuvo llugar la tercer xunta de siguimientu del Alcuerdu Asturies Educa ente responsables de la Conseyería d'Educación y los sindicatos firmantes. Nesta xunta fízose un repasu poles clausules del alcuerdu poniendo procuru nos plazos d’ implementación de les midíes contemplaes nel pactu.

Nel alcuentru que duró más de trés hores tratáronse estos temes:

Decretu d' Equidá. Cambiu del Decretu d'Orientación (147/2014) y Reglamentu de los centros d'educación especial

L'alcuerdu supunxo la paralización de l'aprobación del proyectu de Decretu d'Equidá, que taba a puntu de ser aprobáu cuando empezó la fuelga del pasáu cursu. Les organizaciones sindicales esiximos la retirada del proyectu de decretu porque nun garantizaba la dotación básica de los centros y taba prevista la so implementación ensin nengún tipu de midía presupuestaria, lo que volvia’l decretu, papel moyáu.

Rematando xunetu constituyóse un grupu de trabayu ente la Conseyería y los sindicatos firmantes pa facer una nueva propuesta de decretu, poniendo un plazu pa ello.

La Conseyería tien previstu finar la redaición del nuevu proyectu a lo llargo del mes de payares y tendría de tar aprobáu enantes que remate l'actual cursu.

Servicios d' orientación

Al respeutu de l'amenorgamientu de la ratio alumnáu/orientadora, el Decretu 147/2014 establez qun perfil d'orientación por cada 400 alumnos y alumnes. L'alcuerdu va amenorgar la ratio a 350. Propunximos que'l cambéu del decretu incluya 350 “o fración de…” pa garantizar qu'aquellos centros que queden cerca del númberu estableciu nun pierdan el recursu. Amás va revisase la situación de los centros qu'anguaño tán en cifres cercanes a los 400 y que nun cunten con orientadora a tiempu completu.

Respectu al Reglamentu d'Organización y Funcionamientu de los Centros d'Educación Especial caltiense'l compromisu de tenelu aprobáu enantes que la llexislatura fine.

Auxiliares educadores

Nel pactu incluyóse la contratación de 30 auxiliares educadores a razón de 10 por cursu entamando pol actual. Na actualidá yá hai 14 auxiliares contrataos y esperen adelantrar a febreru la contratación de los previstos pal cursu que vien.

Aules d'Inmersión

Cumplióse lo previsto nes aules de les cuenques mineres y ta estudiandose la situación de l'aula d'Uviéu pa reforzar la dotación de la mesma.

Profesoráu de Servicios a la Comunidá

Va a cuenta del presupuestu de 2026 la correspondiente partia pa contratar una parte de los PSC que faen falta pa que tolos centros d'educación secundaria cunten con esti perfil yá que na actualidá hai unos 25 centros ensin el mesmu que son atendíos polos PSC de los EOE. El restu van ser incluyíos nel presupuestu de 2027, tal que quedó alcordáu na mesa de negociación pa la desconvocatoria de la fuelga.

Aules Abiertes

Anguañu hai 12 aules abiertes que cunten con perfil completu de PT y AL y otres 12 cunten con 1,5 perfiles ente PT y AL. Taba previstu qu'en setiembre del 26 se completaren otres 6 y les restantes un añu dempués pero va intentase completales toes en septiembre del 26.

Ratios de FP

Constituyóse un grupu de trabayu nel que participen docentes de toles families profesionales pa revisar la propuesta de desdobles y incluyir toos aquellos que se consideren aconseyable, el trabayu en grupos amenorgaos por motivos rellacionaos cola seguridá. Los desdobles van entamar a facese en septiembre de 2026.

Esti cursu la Inspección va facer un muestreu pa comprobar el númberu de matriculaciones pa garantizar qu'onde se supere la ratio se fagan desdobles.

Alministrativos pa los centros d'infantil y primaria

El pactu inclúi la contratación de 30 alministrativos de calter itinerante pa emprestar asistencia nos centros d'infantil y primaria.

Incorporáronse na conseyería 3 alministrativos que dan sofitu a los 59 centros con equipos directivos unipersonales pa les xeres burocrátiques (por casu la contabilidá). Na actualidá tán recibiendo formación específica pa les xeres que van realizar y yá se distribuyeron los centros que va atender caúnu.

Los otros 27 van incorporase según lo previsto nel pactu y les sos places van ser itinerantes, incorporándose a los centros nos momentos de más trabayu nos mesmos.

Recordemos a l'Alministración que los 27 alministrativos itinerantes tamién tendríen d'emprestar asistencia a los centros con equipos directivos unipersonales.

Nueva aplicación de faltes, comunicaciones, etc

La nueva aplicación pa pasar llista y unviar comunicaciones a les families va dir incorporando nuevos módulos pasu ente pasu. L'Alministración asume'l nuesu planteamientu de percanciar propuestes de meyora de los módulos que yá tán funcionando.

Aplicación pa la evaluación automatizada del alumnáu y modelos de documentos

La Conseyería va facer cambios na normativa pa que la evaluación por competencies pueda realizase de mou asemeyáu a como s'evaluaba enantes desaniciando la obligación de valorar tolos criterios de calificación, anque quien deseyen siguir evaluando como enantes pola ponderación van poder facelo.

Los servicios informáticos tán trabayando na aplicación informática d'evaluación tal que taba previstu cola fin d'amenorgar les xeres burocrátiques que tien de facer el profesoráu.

Al respeutu de los modelos de documentos (actes, protocolos, PTI, dictames, etc) el trabayu sigue'l so cursu. Inspección ta impulsando dalgunos d'ellos, van crease grupos de trabayu pa otros y ta previstu que delles guíes tean disponibles esti trimestre.

Axilización de sustituciones

Na primer convocatoria col nuevu sistema hubo un retrasu na publicación de la mesma de más d'hora y media que s'atribúi a un fallu de coordinación de los equipos implicaos. Espérase que nun haya más problemes nes siguientes convocatories. Va publicase ‘l calendariu d'axudicaciones d'esti trimestre y caltiense la previsión d'entamar con dos llamamientos una selmana y unu a la siguiente a partir del segundu trimestre, llunes y xueves una selmana y miércoles la siguiente.

Ta previstu a lo llargo del cursu poner en funcionamientu un sistema de bolses estraordinaries abiertes de manera permanente, asemeyao a como funcionen les acreditaciones del Programa Hable, p'aquelles especialidaes nes que suel haber dificultaes pa cubrir toles places vacantes o que suelen escosase rápido.

Cambéu del Plan d'Evaluación Docente

L'alministración, va entamar a tramitar el cambéu del plan en payares pa que se desanicien les penalizaciones por baxes de llarga duración. Una vegada aprobáu’l cambéu, -espérase qu'enantes del mes de mayu- naide va perder el complementu de productividá acomuñáu a la evaluación docente.

El Presupuestu de 2026 va cuntar cola partida correspondiente.

Complementos salariales

En xineru va facese una xubida xeneral pa tola plantiya de 100 euros mensuales por 14 pagues. En septiembre de 2026 va haber una nueva xubida de 70 euros mensuales pa tol personal con menos de 6 años d'antigüedá.

El Complementu d'equiparación del profesoráu de FP (Cuerpu 0591) ta incluyíu na previsión presupuestaria de 2026.

En xineru de 2027 va aplicase otra xubida xeneral a tola plantiya de 40 euros mensuales. La xubida nel añu pal conxuntu de la plantiya va ser de 1960 euros ente que pa quien tengan una antigüedá inferior a seis años va algamar los 2940 euros.

Amenorgamientu horariu pal profesoráu mayor de 55 años

La negociación nel Grupu de Trabayu correspondiente tien d’entamar enantes del 10 de payares y el modelu tien de quedar alcordáu a más tardar en febreru de 2026 pa la so implementación en 2027.

Modelu de desenvolvimientu profesional

La derogación del modelu d'evaluación docente y la so sustitución por otru modelu de desenvolvimientu profesional similar al d'otros cuerpos de funcionarios ye la parte del alcuerdu más complexa por cuenta de que tien de sortear sentencies anteriores y precisa de normativa que lleva acomuñada una tramitación más llarga, probablemente con rangu de llei. La Secretaría Xeneral Técnica de la Conseyería ta estudiando les distintes posibilidaes.

Complementu pa la compensación de los descuentos pa baxes de más de 90 díes del personal adscrito a MUFACE

Esti complementu que va evitar l'amenorgamientu de retribuciones pal personal de MUFACE en baxes de más de 91 díes va incluyise nos presupuestos de 2026.

Reconocencia de les especialidaes de llingua asturiana y gallegu asturianu

La Conseyera va solicitar una xunta col Ministeriu pa tratar esti tema y comprométese a informar a les organizaciones sindicales con antelación de la fecha de la xunta.

Incorporación de los 120 profesionales de PT y AL

Mantiense la fecha prevista d'incorporación de los 120 profesionales de PT y AL al entamu de febreru, adelantrándose dos meses respeutu al calendariu primeramente alcordáu, qu'afitaba abril como plazu.

Finalmente, CCOO treslladó la situación de dellos centros, esixendo que se resolvieren los problemes esistentes en rellación cola dotación de personal d'estos centros:

CP Turiellos: 384 matrícules ensin orientador a xornada completa y con una dotación insuficiente de PT y AL. Amás, nun cunta con alministrativu inda cuando xestiona un comedor con más de 200 usuarios. La Conseyera comprométese a buscar una solución.

CP Condáu de Noreña: 360 matriculaciones ensin orientador a xornada completa. La Conseyería va estudiar la situación.

CP Veneranda Manzano: Nun s'unvió la media xornada pa compensar l'horariu de la PT que pasó a formar parte del equipu directivu. La Conseyería comprometiose a estudiar esti casu, asegurando que la directriz ye de cubrir toles compensaciones d'horariu de los equipos directivos.

CPEB Colombres: Agrupamientu del alumnáu d'infantil en dos grupos estremando al alumnáu de 4 años ente'l grupu de 3 y el de 5. La Conseyería considera que la situación del CPEB axústase a la norma y nun va camudar el so criteriu.

La Conseyería tamién nos informó de que va camudar el calter presencial de les redes por aciu del cambéu de la Circular d'Entamu de Cursu.