Sindicato de Enseñanza de CCOO de Asturias | 25 enero 2026.

La Conseyería d’Educación acepta camudar la plantía orgánica y va incrementar les places convocaes pa les oposiciones de 2026

  • Educación va actualizar la plantía orgánica pa reflexar les necesidaes reales del sistema educativu.
  • La convocatoria d’oposiciones de 2026 va incrementar les places y va garantizar toles especialidaes del cuerpu de maestros.
  • CCOO vota en contra de la OEP pola esistencia de más de 2.500 places d’interinidá y la falta de soluciones estructurales.

El sindicatu llogra que la Conseyería camude la so propuesta inicial, se comprometa a actualizar la plantía orgánica desfasada y a incrementar les places na próxima convocatoria d’oposiciones.

04/12/2025.
Oposiciones

Oposiciones

El Sindicatu d’Enseñanza de CCOO d’Asturies informa de los avances decisivos llograos na negociación de la Ufierta d’Empléu Públicu (UEP) docente pal Principáu, tres consiguir de l’Alministración compromisos concretos que rectifiquen el so planteamientu inicial y respondan a les necesidaes reales del sistema educativu asturianu.

Nuna reunión anterior, la Conseyería d’Educación plantegó una propuesta que CCOO calificó d’«insuficiente y regresiva». Esta consistía en reservar les 232 places xeneraes nel exerciciu actual pal cuerpu de maestros, posponiendo la so convocatoria hasta 2028, y reducir la próxima oposición a namás 324 places procedentes de la UEP de 2024.

La Conseyería alegaba, pa xustificar esa reducción, que la plantía orgánica de los centros namás reflexaba alredor de 250 vacantes pa maestros. Dende CCOO Enseñanza Asturies refugamos con firmeza esti argumentu, demostrando que dicha plantía ta desfasada y presenta un desfase de más de 2.500 places respeutu a les necesidaes reales de los centros educativos, frutu d’años de falta d’actualización y de les nueves demandes del sistema.

Los compromisos llograos: un calendariu claro y places al alza.

Na reunión que tuvo llugar güei, l’Alministración asumió los siguientes compromisos:

  • Revisión y actualización de la plantía orgánica: La Conseyería comprométese a revisar y actualizar con urxencia la plantía orgánica de los centros pa que reflexe fielmente les vacantes y necesidaes esistentes.
  • Incrementu de places na convocatoria: Va modificase la resolución de convocatoria de les próximes oposiciones (que va fusionar les ofertes d’empléu públicu de 2024 y 2025) pa incrementar el númberu de places que caberamente van salir a oposición en xunu de 2026.

 Calendarización:

  • Avientu de 2025 / Xineru de 2026: Publicación de la convocatoria d’oposiciones pal cuerpu de maestros, que va fusionar les UEP de 2025 y 2026.
  • Enantes de finar abril de 2026: Aprobación de la plantía orgánica actualizada y, en consecuencia, publicación d’un axuste de la convocatoria pa incrementar el númberu de places en toles especialidaes onde seya necesariu.
  • Garantía d’especialidaes: Garantízase la convocatoria de places en toles especialidaes del cuerpu de maestros hasta un total de 556 places.

Sicasí, dau que esisten más de 2.500 places d’interinidá y nun hai previsiones de que se solucione esti problema estructural, finalmente votamos en contra de la UEP.

    •