Sindicato de Enseñanza de CCOO de Asturias | 25 enero 2026.

El xulgáu anula la reducción de plazos nes bolses estraordinaries d’interinidá

La xusticia da la razón a CCOO y obliga a la Conseyería d’Educación a respetar los plazos na presentación de solicitúes a les bolses d’interinidá

  • CCOO esixe a la Conseyería tresparencia y respetu a la llegalidá nes convocatories futures pa garantizar la igualdá d’oportunidaes.
  • La sentencia reafirma que’l trámite d’urxencia nun pue llendar derechos nin alterar los plazos fixaos nel Alcuerdu d’Interinos.

El Sindicatu d’Enseñanza de CCOO Asturies ganó’l recursu contenciosu-alministrativu que interpuso contra la Conseyería d’Educación del Principáu d’Asturies pol usu indebíu del trámite d’urxencia na ellaboración de bolses estraordinaries d’interinidá docente. Trátase del segundu varapalu xudicial que’l Sindicatu impón a la Conseyería d’Educación esti mes, tres tumbar recientemente’l concursu de méritos de la estabilización por nun incluyir la reserva de places pa persones con discapacidá.

15/12/2025.

El Xulgáu de lo Contenciosu-Alministrativu númberu 5 d’Uviéu estimó’l recursu presentáu por CCOO y anuló la base de la convocatoria que reducía a cinco díes hábiles el plazu de presentación de solicitúes, al considerar que dicha reducción vulnera la normativa vixente y los acuerdos negociaos en mesa sectorial.

La sentencia recuerda que l’Alcuerdu de Mesa Sectorial de Personal Docente pol que s’aprueba l’Alcuerdu d’Interinos, ratificáu pol Conseyu de Gobiernu d’Asturies, establez un plazu de diez díes hábiles pa la presentación de solicitúes nes bolses d’interinidá, y subraya amás que la Llei 39/2015 prohibe espresamente que’l trámite d’urxencia afecte a los plazos de presentación de solicitúes. El xulgáu conclúi que la Conseyería aplicó esta reducción ensin xustificación dalguna d’interés públicu, incurriendo asina nuna actuación contraria a derechu.

Dende CCOO Enseñanza Asturies valórase esta sentencia como una victoria sindical y del profesoráu interín, yá que pon frenu a una práctica reiterada de l’Alministración educativa que xeneraba inseguridá xurídica, llindaba la concurrencia en condiciones d’igualdá y dificultaba l’accesu al emplegu públicu docente.

“L’usu sistemáticu del trámite d’urxencia nun pue convertise nuna vía pa recortar derechos nin pa eludir los acuerdos negociaos. Esta sentencia dexa claro que la Conseyería nun pue actuar de manera unilateral nin arbitraria”, señalen dende’l sindicatu.

CCOO esixe agora a la Conseyería d’Educación que rectifique la so forma d’actuar, respete los alcuerdos vixentes y garantice que cualquier convocatoria de bolses d’interinidá se faiga con plazos suficientes, tresparencia y plenu respetu a la legalidá y a la negociación colectiva.

El sindicatu alvierte que va siguir utilizando toles ferramientes sindicales y xurídiques necesaries pa defender los derechos del profesoráu y frenar los abusos alministrativos que precaricen entá más les condiciones llaborales na enseñanza pública.

    •