Sindicato de Enseñanza de CCOO de Asturias | 12 abril 2026.

CCOO Enseñanza d’Asturies esixe una respuesta inmediata pola la grave situación de les infraestructures nel CP Eulalia Álvarez Lorenzo

  • Temperatures inaceptables, deficiencies estructurales y riesgu pa la seguridá afeuten al alumnáu y al profesoráu.

El sindicatu d’Enseñanza de Comisiones Obreres d’Asturies participó esta mañana na concentración convocada pola AMPA del CP Eulalia Álvarez Lorenzo pa denunciar la crítica situación que vive’l centru educativu, marcada por graves deficiencies nes infraestructures y por temperatures inaceptables qu' afeuten direutamente al bienestar y a la seguridá del alumnáu y de les y los trabayadores docentes.

02/02/2026.
Concentración del AMPA del CP Eulalia Álvarez Lorenzo

Concentración del AMPA del CP Eulalia Álvarez Lorenzo

Tres la movilización, representantes de CCOO axuntámonos col equipu directivu del colexu pa conocer de primera mano la magnitú de los problemes. La situación que se vive ye la d’un centru que arrastra dende hai años deficiencies estructurales que nun recibieron una respuesta afayadiza poles alministraciones públiques, un deterioru progresivu que se dio nun contestu d’austeridá neolliberal que frenó cualquier inversión destinada a la meyora de les infraestructures públiques y que nos dexa un panorama murniu tres d’años d’abandonu.

La calefacción, que nun cumple la normativa vixente, obliga al alumnáu a entamar la selmana con apenes 13º nes aules, llegando inclusive a rexistrase 9º nos baños. A ello súmense puertes furruñoses y deterioraes con problemes pa evacuar en casu d’incendiu, escapes d’agua pelos techos y lluminaires, un patiu infantil en condiciones insegures, ventanes inservibles, daños derivaos d’intervenciones previes y una instalación eléctrica incapaz de sofitar l’actividá docente ordinaria.

CCOO considera inaceptable que l’alumnáu y el profesoráu tengan que convivir col fríu, les humedaes, el riesgu de desprendimientos o filtraciones, y que elementos esenciales como puertes, ventanes o infraestructures básiques nun s’atopen en condiciones adecuaes. Esta situación compromete non solo’l desenvolvimientu normal de l’actividá educativa, sinón tamién la seguridá del conxuntu de la comunidá escolar.

Por ello, esiximos a les alministraciones públiques competentes —conceyu y conseyería— una intervención inmediata y urxente. Nun ye almisible siguir demorando soluciones cuando hai menores y trabayadores espuestos a riesgos evitables.

CCOO apoyará toles iniciatives de la comunidá educativa pa garantizar que’l centru disponga de les condiciones dignes y segures que merece y xuniráse a cuantes movilizaciones se convoquen pa consiguir respuesta a les sos xustes demandes.

D’otra parte, esiximos a la Conseyería d’Educación l’ellaboración d’un plan estratéxicu de meyora de les infraestructures nos colexos ya institutos públicos d’Asturies, yá que nun tamos falando de casos aisllaos, sinón d’una situación estructural derivada de les lóxiques de xestión neoliberal.