Sindicato de Enseñanza de CCOO de Asturias | 11 abril 2026.

La enseñanza na defensa del empléu

CCOO Enseñanza Asturias movilízase en Navia n’apoyu a los y les trabayadores d’ENCE ante l’ERE anunciáu

  • El sindicatu denuncia l’impactu social y económicu grave que supondría’l despíu de cerca d’un centenar de persones.

El Sindicatu d’Enseñanza de CCOO Asturies llevó a cabu na mañana de güei dos concentraciones nel IES Galileo Galilei y nel Colexu Públicu Ramón de Campoamor de Navia, en solidaridá coles y colos trabayadores d’ENCE, tres l’anunciu d’un Expediente de Regulación d’Emplegu que supondría’l despíu de cerca d’un centenar de persones.

06/02/2026.
Apoyo a los trabajadores de ENCE IES Galileo Galilei.

Apoyo a los trabajadores de ENCE IES Galileo Galilei.

Estes concentraciones, sofitaes pola comunidá educativa de dambos centros, enmárcanse na voluntá del sindicatu d’amosar el so apoyu a una plantilla que ta travesando una situación d’enorme inseguridá llaboral y social, y de denunciar l’impactu grave que tendría esti ERE non solo sobre les persones afeutaes direutamente, sinón tamién sobre’l conxuntu del texíu económicu y social del conceyu de Navia y de tola redolada.

ENCE ye la empresa matriz de la fábrica de papel, que da trabayu direutu a alredor de 400 persones y xenera cientos d’emplegos indirectos. L’anunciu de los despíos supón, entós, una amenaza real pal futuru de munches families y pa la estabilidá d’un territoriu yá castigáu pola perda d’oportunidaes llaborales.

Dende CCOO Enseñanza Asturias dexa claro que la defensa del empléu dignu y estable ye una causa común de tola clas trabayadora, tamién dende l’ámbitu educativu. «La escuela pública nun pue quedar al marxe de los conflictos llaborales que aféuten al so entornu. La educación y l’empléu son puntales fundamentales p´asegurar el futuru de los nuesos pueblos», señalen dende’l sindicatu.

CCOO Enseñanza Asturies esixe a la empresa que retire l’ERE y apueste por soluciones que garanticen el caltenimientu del empléu, y reclama igualmente a les alministraciones públiques que s’impliquen de mou activu pa defender los puestos de trabayu y el futuru industrial de la contorna.

El sindicatu va siguir sofitando les movilizaciones de les trabayadores y los trabayadores d’ENCE y va participar en cuantes acciones seyan necesaries na defensa del empléu y de los derechos llaborales.