Sindicato de Enseñanza de CCOO de Asturias | 12 abril 2026.

Seguridá nos centros

CCOO esixe un protocolu urxente pa suspender les clases ante fenómenos meteorolóxicos adversos.

  • La falta d’un protocolu dexa a docentes y alumnáu espuestos a riesgos evitables mientres les alertes d’AEMET.
  • El sindicatu denuncia la falta d’actuación de la Conseyería y señala’l grave incidente asocedíu nel CP Valdellera de Posada de Llanes.

Ante la situación d’alerta meteorolóxica que ta afectando a tol Estáu dende va unes selmanes y los numberosos informes científicos que alerten del aumentu de los fenómenos estremos como consecuencia del cambéu climáticu, el Sindicatu d’Enseñanza de CCOO Asturies denuncia la irresponsabilidá de la Conseyería d’Educación del Principáu por siguir ensin establecer un protocolu específicu que regule la suspensión de la actividá llectiva nestes circunstancies.

12/02/2026.
Desperfectos en la cubierta del polideportivo del CP Valdellera.

Desperfectos en la cubierta del polideportivo del CP Valdellera.

L' Axencia Estatal de Meteoroloxía (AEMET) emitió alertes por fuertes raches de vientu, condiciones que xeneraron un escenariu de riesgu pa la población en xeneral y, en particular, pa’l personal docente que tien de desplazase a los sos centros de trabayu. Mientres otres comunidaes autónomes escoyeron suspender les clases pa garantizar la seguridá de la comunidá educativa, como por exemplu Cataluña, Asturies nun tomó una midida asemeyada, dexando a miles de docentes y estudiantes nuna situación de vulnerabilidá.

Lo asocedío nel CP Valdellera de Posada de Llanes, onde la cubierta del polideportivu foi arrancada pol vientu y desplazada pel patiu, constitúi un avisu gravísimu de lo que pudiera asoceder n’horariu llectivu. Namás la casualidá evitó un accidente de consecuencies irreparables.

Dende CCOO Enseñanza Asturies tamién denunciamos que, n' ausencia d’un protocolu claru y consensuáu, munchos docentes vieronse obligaos a desplazase a los sos centros de trabayu asumiendo graves riesgos nos sos desplazamientos. Esta falta de previsión nun solo pon en peligru la integridá física del personal docente, sinón, tamién xenera incertidume y descoordinación na toma de decisiones.

Por ello, esiximos a la Conseyería d’Educación del Principáu d’Asturies que estableza de manera urxente un protocolu específicu que regule la suspensión de les clases ante fenómenos meteorolóxicos adversos. Dichu protocolu tien de garantizar la seguridá de tola comunidá educativa, contemplando criterios oxetivos basaos nes alertes d’AEMET y coordinándose con otres alministraciones y organismos competentes.

El Sindicatu d’Enseñanza de CCOO Asturies va siguir trabayando pa defender los derechos y la seguridá de los y les trabayadores de la enseñanza, y confiamos en que les alministraciones competentes actúen con responsabilidá y celeridá pa evitar que situaciones como esta se repitan nel futuru.