Sindicato de Enseñanza de CCOO de Asturias | 12 abril 2026.

CCOO celebra que’l Conseyu Escolar avale por unanimidá la eliminación de les penalizaciones poles baxes médiques, una reivindicación histórica del Sindicatu

    El dictame, aprobáu güei, insta a retirar definitivamente’l "perversu" criteriu que consideraba absentismu les baxes por enfermedá grave, una llucha que CCOO caltuvo en solitariu durante años y que consiguió incluyir nel Pactu Asturies Educa dempués de la fuelga indefinida de 2025.

    24/02/2026.
    Movilizaciones de la enseñanza pública asturiana.

    Movilizaciones de la enseñanza pública asturiana.

    El Sindicatu d’Enseñanza de CCOO d’Asturies valora de manera positiva l’aprobación güei por unanimidá nel Conseyu Escolar del Principáu d’Asturies d’un dictame favoratible a la eliminación de les penalizaciones nel complementu de productividá vinculao al II Plan d’Evaluación Docente, pal personal en baxa de llarga duración.

    CCOO recuerda qu’ esti dictame sofita una de les midíes centrales recoyíes nel marcu del Pactu Asturies Educa, algamáu dempués de la fuelga indefinida que’l sector educativu asturianu protagonizó en mayu y xunu de 2025. Movilización histórica puso enriba la mesa la necesidá de revertir los aspeutos más negativos d’un modelu impuestu en 2021.

    El Sindicatu d’Enseñanza de CCOO foi l’únicu sindicatu que s’opunxo dende l’orixe al II Plan d’Evaluación Docente na Mesa Xeneral de negociación de la Comunidá Autónoma. Siempres refutamos l’aplicación de la llogística de la productividá neoliberal a les rellaciones llaborales nel sector públicu educativu. Esti plan, aprobáu col apoyu de USIPA, ANPE, CSIF y UGT, incluyía un elementu especialmente perversu: la consideración como absentismu de les baxes médiques.

    Por culpa d’esta fórmula perversa, nos últimos diez años, más de 1.000 docentes que sufrieron enfermedaes graves (depresiones, cáncer, intervenciones quirúrgiques o accidentes graves) vieron menguaos los sos ingresos, llegando a perder hasta 500 euros al mes nel complementu salarial. Castigábase, de fechu, a quien más sofitu institucional necesitaba.

    Por ello, CCOO celebra que’l máximu órganu consultivu en materia educativa, el Conseyu Escolar del Principáu d’Asturies, diera agora'l so vistu bonu por unanimidá a la eliminación d’estes penalizaciones. Consideramos qu’ esti dictame, que será remitíu al Conseyu de Gobiernu del Principáu, supón un espaldarazu institucional a una demanda xusta y un pasu firme pa que la Conseyería d’Educación concretize de manera inmediata los cambeos normativos necesarios.

    Dende CCOO insistimos en que la evaluación docente nun puede ser nunca una ferramienta pa individualizar la rellación llaboral nin pa recortar derechos, sinón un instrumentu pa la meyora colectiva del sistema públicu. Esiximos al Gobiernu del Principáu que aceleré los trámites pa facer efectiva esta modificación y compensar asina’l dañu causáu a cientos de compañeres y compañeros na última década.