Sindicato de Enseñanza de CCOO de Asturias | 11 abril 2026.

Peligru estructural nun centru educativu de Piedres Blanques

CCOO esixe una actuación inmediata ante’l riesgu de nuevos desprendimientos nel IES Isla de la Deva

  • El desprendimientu de delles llámines na techumbre obligó a zarrar accesos y altera’l Plan d’Evacuación del centru.
  • El Sindicatu reclama una intervención técnica urxente y advierte que, ensin respuestes, denunciará la situación énte la Inspeición de Trabayu.

El Sindicatu d’Enseñanza de CCOO denunció güei nos Comités de Salud Llaboral y Prevención la situación d’emerxencia y inseguridá que ta viviendo’l IES Isla de la Deva, en Piedres Blanques, tres el reciente desprendimientu delles llámines de policarbonatu na cubierta del 'hall' principal.

26/02/2026.
Cubierta del IES Isla de la Deva.

Cubierta del IES Isla de la Deva.

Esti incidente, que dexó al descubiertu l’interior del edificiu, nun representa pa la organización un fechu aislláu, sinón que ye’l síntoma d’un abandonu grave y xeneralizáu nel caltenimientu de les infraestructures educatives n’Asturies, frutu de les polítiques neoliberales d’austeridá presupuestaria que’l gobiernu autonómicu aplica dende la crisis de 2008.

El sindicatu alvierte que’l peligru permanez activu, yá que la estructura actual presenta una inestabilidá manifiesta con riesgu real de nuevos desprendimientos pola aición del vientu. Esta situación obligó a clausurar el 'hall' y l’entrada principal, desviando’l tránsitu d’alumnáu y docentes escontra les salíes d’emerxencia, lo que compromete seriamente’l Plan d’Evacuación del centru.

Ante la gravedá de los fechos, Borja Llorente, Secretariu Xeneral del Sindicatu d’Enseñanza de CCOO d’Asturies, foi taxante al señalar que “nun se pue consentir que la comunidá educativa conviva a diariu con una amenaza per enriba de les sos cabeces pola desidia de l’Alministración autonómica”. Llorente insistió en que “la seguridá del alumnáu y del personal ye innegociable, y l’estáu del teyáu del IES Isla de la Deva cruzó una llínia colorada que esixe soluciones, non más parches”.

La falta de seguridá convirtió zones comunes en áreas ensin condiciones d’usu, anguaño ocupaes por cubos pa recoyer filtraciones d’agua y con accesos estremaos a despachos. Pa la organización, esta improvisación d’accesos llaterales supón un riesgu amestáu en casu d’una evacuación real, yá que les víes de salida tán siendo usaes indebidamente pal fluxu ordinariu de persones.

Por too ello, el Sindicatu d’Enseñanza de CCOO esixe a la Conseyería d’Educación una intervención técnica d’urxencia qu' asegure o retire les llámines inestables y acometa la reparación integral de la cubierta de mou nmediatu.

Como señalábamos al entamu d’esta nota, CCOO treslladó la situación del institutu esta mesma mañana na reunión de los Comités de Salud Llaboral y Prevención, reclamando una fueya de ruta d’obres urxente que permita reestablecer la normalidá nos accesos y garantice’l cumplimientu de la normativa de prevención.

De nun atopase una respuesta satisfactoria a la mayor brevedá, el sindicatu yá anunció que procederá a denunciar los fechos énte la Inspeición de Trabayu por un incumplimientu manifiestu de la seguridá llaboral.