Sindicato de Enseñanza de CCOO de Asturias | 11 abril 2026.

CCOO denuncia’l ’caos normativu’ na implantación de la nueva FP: La Alministración diz-y al profesoráu que “s’apañe”

    El Sindicatu d’Enseñanza de CCOO Asturies esixó güei a la Conseyería d’Educación la creación urxente d’un foru de consulta estable que ponga fin a la “improvisación y la inseguridá xurídica” que arrodia la implantación del nuevu modelu de Formación Profesional Dual. Según denuncia’l sindicatu, la falta de direutrices clares y los fallos estructurales de la plataforma informática tán dexando al profesoráu nuna situación de desamparu, obligáu a 'improvisar soluciones” énte un sistema que nun termina d’arrancar.

    10/03/2026.

    Dende CCOO vien constatándose un “clima d’inseguridá ténica” ente’l profesoráu de FP. L’ausencia de rempuestes por escrito a consultes crítiques —como la vixencia de los anexos de siguimientu o la xestión de los planes de recuperación— ta provocando que l’alumnáu seya unviáu a centros de formación esternos ensin la cobertura documental necesaria. “L’ Alministración responde con silenciu o promeses incumplíes, mientres los centros educativos vense obligaos a “buscase la vida pela so cuenta”, denuncien.

    Ún de los principales escoyos ye la plataforma GEPEP, que, según les quexes recabades pol sindicatu, nun ta adaptada a la normativa vixente. El sistema torga, por exemplu, la “dualización” de los módulos optativos, a pesar de que la llei lo contempla. Esta desconexón ente la ferramienta informática y la realidá llegal ta xenerando una “ficción burocrática”, yá que los Resultaos d’Aprendizaxe (RA) que se treslladen a les empreses nun s’axusten a les necesidaes reales del alumnáu, amenorgando la formación a un meru trámite.

    El sindicatu tamién alerta sobre l’usu fraudulentu de les práutiques per parte d’algunes empreses. En munches families profesionales, les estancies llímítense a xeres mecániques y repetitives, ensin nengún componente formativu. “Ta utilizándose’ l alumnáu como mano d’obra de baldre pa aumentar los márxenes empresariales, eludiendo cualquier implicación nel procesu d’enseñanza-aprendizaxe”, denuncien dende CCOO, que esixe un siguimientu rigorosu y la esclusión de les empreses que incumplan la so responsabilidá formativa.

    A los problemes anteriores xúnense errores nel cálculu de les hores llectives, con planificaciones basaes en cargues horaries de cursos anteriores que inoren los cambeos introducíos pola nueva optativa. Esto pon en riesgu la correuta evaluación del alumnáu. De la mesma manera, el sindicatu denuncia la situación de “total desamparu” del alumnáu migrante que, por nun tener númberu de la Seguridá Social, vese imposibilitáu pa realizar les práutiques, quedando escluyíu del sistema ensin que la Alministración ufierte dalguna alternativa.

    Énte esti panorama, CCOO Enseñanza Asturies esixe a la Conseyería:

    Una nueva guía d’instrucciones que resuelva les ambigüedaes del Decretu d’agostu de 2025.Un foru estable y formal, con participación del profesoráu y del personal técnicu, que ufreza rempuestes vinculantes por escrito.La actualización inmediata del sistema GEPEP, pa que dexe de ser un estorbu y se convierta nuna ferramienta útil.La reformulación del decretu pa axustalu a les necesidaes reales de la FP pública asturiana.Un control efeutivu de les empreses collaboradores, vetando a aquelles que utilicen les práutiques como mano d’obra gratuita ensin función formativa.“Ye inaceptable que se pretenda vender una imaxe d’éxitu mientres se-yos diz al personal docente que s’apañe. La transición al nuevu modelu nun pue facese a costa de la salú llaboral del profesoráu nin de la calidá educativa, nin pue ser la puerta d’entrada a una privatización encubierta de la Formación Profesional”, conclúi’l sindicatu, que anuncia que va caltener la vixilancia sobre’l procesu.