Sindicato de Enseñanza de CCOO de Asturias | 12 abril 2026.

CCOO celebra’l mayor aumentu de la historia de la Plantía Orgánica Educativa, que va superar los 10.000 profesores n’Asturies

    El sindicatu valora l’aumentu de más de 550 places como primer pasu pa correxir el desafase históricu cola plantía real y fortalecer l’empléu públicu pa evitar posibles recortes futuros

    13/03/2026.

    El Sindicatu d’Enseñanza de CCOO d’Asturies valoró de manera positiva’l zarru de la negociación de la Plantía Orgánica de los centros educativos pal cursu 2026/2027. L’acuerdu algamáu güei cola Conseyería d’Educación supón un incrementu de más de 550 places, lo que va permitir que, por primer vegada dende la tresferencia de competencies educatives a Asturies, la Plantía Orgánica supere los 10.000 profesores a xornada completa.

    Pa’l sindicatu, esti aumentu ye una bona noticia, pero más pol cambéu de tendencia que supón. Nos caberos años, CCOO vien denunciando’l gran desfase estructural ente la plantía real de los centros (que ronda los 12.000 profesionales) y la plantía orgánica (que nun pasaba de les 9.500 places). Esti desequilibriu facía que miles de puestos de trabayu que tán físicamente nos centros y son necesarios pal funcionamientu del sistema educativu nun pudieren tar consolidaos nin cubiertos al traviés de procedimientos selectivos ordinarios (oposiciones) o concursos de tresllaos, al nun tar integraos na documentación oficial de puestos o plantía orgánica

    «La modificación al alza acordada güei apunta na direición correuta. Nun soluiciona’l problema d’un plumazu, pero entama’l camín necesariu pa iguar dambes plantíes, la real y l’orgánica.», señaló’l secretariu xeneral del Sindicatu d’Enseñanza de CCOO d’Asturies. «Cada plaza que pasa a formar parte de la plantía orgánica ye una plaza que se fortalece, que se consolida y que dexa d’estar nel llimbu xurídicu».

    Esti aumentu de la plantía tien una consecuencia direuta ya inmediata nel empléu públicu. Tal como taba previstu, l’aumentu de la plantía orgánica va permitir ampliar la Ufierta Pública d’Empléu d’esti añu.

    Gracies a esta modificación, un total de 232 places más van poder convocase nes próximes oposiciones que se celebrarán en xunu. CCOO recuerda que la Conseyería d’Educación comprometiérase con esta vinculación durante la negociación de la Ufierta d’Empléu, y l’acuerdu de güei fai efectivu esi compromisu.

    «La importancia de que estes places sían cubiertes por personal funcionariu de carrera ta na estabilidá y la garantía de futuru», esplican dende’l Sindicatu d’Enseñanza. «Un funcionariu nun pue ser despidíu. Si estes places se consoliden per oposición, pasan a formar parte de la estructura fixa del sistema. D’esta miente, anque n’un futuru un gobiernu de distintu signu pretendiera aplicar recortes na enseñanza pública, atoparía con que estos puestos tán consolidaos y protexíos por llei».

    El Sindicatu d’Enseñanza de CCOO d’Asturies destaca que, anque l’acuerdu ye un avance significativu, esti procesu tien de continuar. L’oxetivu final sigue siendo l’alcuerdu plenu ente la plantía real y la orgánica, pa garantizar la calidá del sistema educativu, la estabilidá de les plantíes de los centros y la cobertura xurídica de tolos puestos de trabayu necesarios.

    El sindicatu va siguir trabayando nos próximos meses de negociación pa siguir rebaxando’l desequilibriu estructural y asegurar que tolos profesionales qu' atienden día a día al alumnáu asturianu vean les sos places consolidaes na rellación de puestos de trabayu.