Sindicato de Enseñanza de CCOO de Asturias | 7 agosto 2026.

CCOO, SUATEA y UXT presenten una propuesta de calendariu escolar pedagóxicu pal cursu 2026/2027

    Les organizaciones sindicales mayoritaries del profesoráu asturianu planteguen un modelu más equilibráu y basáu en criterios educativos, con descansu periódicu cada siete selmanes

    07/04/2026.
    Neña trabayando na escuela.

    Neña trabayando na escuela.

    Les organizaciones sindicales CCOO, UXT y SUATEA, que representen a la mayoría del profesoráu de la enseñanza pública asturiana, remitieron a la Conseyería d’Educación la so propuesta conxunta de calendariu escolar pal cursu 2026/2027, basada en criterios pedagóxicos y nes recomendaciones d’espertos y espertas en educación.

    La propuesta contempla un total de 177 díes llectivos, dientro del marcu normativu vixente, calteniendo amás la posibilidá de que los conceyos determinen dos díes non llectivos de calter local. El cursu escolar entamaría’l 9 de setiembre de 2026 y finaría’l 23 de xunu de 2027, con una distribución equilibrada de los periodos lectivos a lo llargo del añu.

    Frente al modelu tradicional de calendariu escolar, historicamente venceyáu a tradiciones de calter relixosu, les organizaciones sindicales planteguen un calendariu pedagóxicu modernu, que caltién los periodos vacacionales de Navidá y Selmana Santa, pero que introduz amás descansu pedagóxicu periódicu, cada siete selmanes llectives.

    Esti enfoque permite que l’alumnáu disponga de pauses habituales a lo llargo del cursu, favoreciendo’l descansu, la recuperación del ritmu d’aprendizaxe y el bienestar emocional. Dellos estudios pedagóxicos señalen que l’alternancia equilibrada ente periodos de trabayu y descansu meyora l’atención, amenorga la fatiga y contribúi a un meyor rendimientu académicu.

    La propuesta distribúi los díes llectivos de forma más homoxénea ente los trés trimestres, evitando periodos llargos y continuos d’actividá llectiva y amenorgando los desequilibrios esistentes nel calendariu tradicional. D’esta manera, el primer trimestre cuntaría con 68 díes llectivos, el segundu con 48 y el terceru con 61, lo que supón una organización más racional y coherente colos procesos d’enseñanza y aprendizaxe.

    Les organizaciones sindicales destaquen que’l calendariu pedagóxicu nun ye una propuesta esperimental nin improvisada, sinón un modelu consolidáu que yá foi implantáu con ésitu n’otres comunidaes autónomes, como Cantabria, y en países del nuesu entornu, como Francia, onde forma parte d’una planificación educativa orientada al bienestar del alumnáu y a la meyora de los resultaos educativos.

    CCOO, SUATEA y UXT consideren qu' avanzar escontra un calendariu escolar basáu en criterios pedagóxicos ye una midida necesaria pa modernizar el sistema educativu, adaptalu a les necesidaes reales del alumnáu y del profesoráu y contribuyir a una educación pública de mayor calidá.

    Por ello, les organizaciones firmantes confíen en que la Conseyería d’Educación valoren esta propuesta con responsabilidá y apertura, teniendo en cuenta la esperiencia acumulada, la evidencia pedagóxica disponible y el consensu sindical esistente alredor d’esti modelu.