Sindicato de Enseñanza de CCOO de Asturias | 7 agosto 2026.

Mesa de Negociación d’Educación

CCOO sofita la derogación de les penalizaciones por baxes de llarga duración nel plan d’evaluación docente

  • La eliminación del requisitu del 30 % de los díes trabayaos evita una doble penalización inxusta pal profesoráu con baxes de llarga duración.
  • CCOO reiteria’l so refugu a un modelu de productividá individual y reclama una carrera profesional docente xusta y colectiva.

La Mesa de Negociación xuntóse güei pa aldericar la tercer modificación del Reglamentu que regula los Planes d’Evaluación de la Función Docente.

13/04/2026.

La evaluación docente ye un sistema implantáu pola Alministración dende va yá 15 años, qu' introduz na enseñanza pública la lóxica de la productividá y la negociación individualizada d’una parte del salariu del personal docente. Un modelu ayenu a la natura del serviciu públicu educativu y que xeneró desigualdaes, incertidume y una presión innecesaria sobre’l profesoráu.

En 2026, pal Cuerpu de Maestros, el Complementu de Productividá asociáu a la Evaluación Docente algama, nel so tramu B, los 324,50 euros mensuales, ente que pal Cuerpu de Profesores d’Educación Secundaria llega a los 509,07 euros al mes. Trátase, poro, d’una parte significativa del salariu que nun tendría que depender de criterios de productividá nin de circunstancies personales sobreveníes.

Precisamente por tar basáu nesa lóxica productivista, el sistema vien dexando cada añu a un centenar de docentes con baxes de llarga duración fuera del cobru d’esti complementu. Ye dicir, amás d’afrontar una enfermedá grave o prollongada, veíen reducidos los sos ingresos en más de 500 euros mensuales si yeren beneficiarios de los dos tramos del complementu. Una doble penalización inxusta que castigaba la enfermedá y vulneraba principios básicos d’equidá y proteición de la salú llaboral.

El Pactu Asturies Educa incorporó una cláusula que supón un avance na protección de los derechos del profesoráu, al eliminar el requisu d’haber trabayao polo menos el 30 % de los díes llectivos p’acceder al complementu. D’esta mena, les persones con cáncer u otres enfermedaes que-yos impidan acudir al so puestu de trabayu dexarán de ser penalizaes económicamente pol so estáu de salú.

El Sindicatu d’Enseñanza de CCOO Asturies, que s’opunxo en solitariu na Mesa Xeneral de la Comunidá Autónoma fai cinco años a la puesta en marcha del segundu plan —como yá lo fixera enantes col primeru—, valora de mou positivu esta derogación parcial d’un sistema que consideramos fondamente inxustu. Trátase d’un primer pasu na direición correuta.

Sicasí, CCOO caltién una posición clara: la educación pública nun pue xestionase con criterios empresariales nin con mecanismos d’incentivu individual propios del sector priváu. El reconocimientu profesional del personal docente tien de basase nun modelu de carrera profesional xustu, tresparente y colectivu, asemeyáu al que yá esfruten el restu de les emplegaes y emplegaos públicos de l’Alministración asturiana.

Por ello, vamos siguir trabayando pa que’l compromisu recoyíu nel Pactu Asturies Educa se cumpla de mou íntegru y pa que l’actual Plan d’Evaluación Docente seya definitivamente substituyíu por un sistema de desarrollu profesional que reconoza la esperiencia, la formación y la dedicación del profesoráu, ensin penalizar la enfermedad nin convertir los derechos llaborales en incentivos condicionaos.