Sindicato de Enseñanza de CCOO de Asturias | 7 agosto 2026.

CCOO y UXT denuncien la falta de sensibilidá de la Conseyería d’Educación na valoración de comisiones de serviciu por causes humanitaries, de salú y conciliación.

  • CCOO y UXT denuncien l’aplicación de criterios restrictivos que desvirtúen el calter humanitariu d’estes midíes.
  • Los sindicatos esixen a la Conseyería una revisión urxente pa garantizar una respuesta xusta a situaciones de salú, conciliación y gravedá persona

Les organizaciones sindicales CCOO Asturies y UXT Servicios Públicos, tres la xunta caltenida cola Conseyería d’Educación p’abordar la regulación y concesión de comisiones de serviciu venceyaes a causes humanitaries, de salú y conciliación, denuncien l’actitú ríxida y insensible del órganu técnicu encargáu de la valoración d’estes solicitúes.

12/06/2026.

Ambes organizaciones recuerden que estes comisiones de serviciu tienen un calter estraordinariu y respuenden a una finalidá claramente establecida: dar respuesta a situaciones personales y familiares d’estrema gravedá que afeuten al funcionariáu de carrera docente y que difícilmente pueden resolvese per otres víes. Trátase, polo tanto, d’un instrumentu imprescindible pa protexer la salú, la conciliación y la dignidá personal del profesoráu, con independencia de que s’alcuentre prestando serviciu n’Asturies o n’otres comunidaes autónomes.

Sicasí, mientres el procesu de valoración, los sindicatos constataron una preocupante falta d’empatía y sensibilidá escontra les situaciones espuestes. L’órganu técnicu aplicó criterios escesivamente restrictivos y una interpretación ríxida de la normativa, alloñándose del espíritu humanitariu que debería guiar esti procedimientu escepcional.

CCOO y UXT llamenten que, llueñe de priorizar l’atención a situaciones d’estrema gravedá, tea imponiéndose una visión burocrática que invisibiliza realidaes personales complexes rellacionaes con enfermedaes graves, dependencias familiares o serios problemes de conciliación. Esta manera de proceder desnaturaliza por completu el sentíu de les comisiones de serviciu y xenera un fondu malestar ente’l profesoráu afeutáu.

Asimesmu, denuncien que la participación sindical nel procesu, reconocida formalmente, vese na práctica vaciada de conteníu, al atopase con una dinámica de funcionamientu zarrada, poco receptiva y ensin marxe real pa incorporar valoraciones que apurran una visión más humana y social de los casos.

Por too ello, CCOO y UXT esixen a la Conseyería d’Educación que revise de manera inmediata los criterios d’actuación del órganu técnicu encargáu de la valoración, garantizando que les decisiones se tomen conforme al oxetivu pal que foron concebíes estes comisiones: ufiertar una respuesta xusta, coherente y verdaderamente humanitaria a situaciones escepcionales d’especial gravedá.

Les organizaciones sindicales insisten en que nun se pue dar la espalda a un colectivu docente que, en momentos críticos de la so vida personal y familiar, precisa del sofitu firmu d’una Alministración comprometida coles persones y non parapetada tres interpretaciones restrictives de la norma. Resulta especialmente inxustu y inaceptable que esta falta de sensibilidá afeute a profesionales que sostuvieron el sistema educativu col so trabayu y que, en munchos casos, viéronse obligaos a abandonar la so tierra en busca d’oportunidaes llaborales. Güei, cuando afronten situaciones d’estrema gravedá personal, sanitaria o familiar, atopar con una respuesta fría, inflexible y fondamente alloñada del calter humanitariu que debería rexir estes comisiones.