Sindicato de Enseñanza de CCOO de Asturias | 7 agosto 2026.

El Sindicatu d’Enseñanza de CCOO d’Asturies denuncia los ataques sistemáticos de la derecha política y sindical al CIFP del Mar

    El Sindicatu d’Enseñanza de Comisiones Obreres d’Asturies denuncia públicamente la campaña d’ataques constantes que ta sufriendo’l CIFP del Mar nos últimos meses per parte del Partíu Popular, Foro y el sindicatu CSIF, que tán actuando de manera coordinada nun claru intentu de desprestixar al centru y al conxuntu del so profesoráu, llanzando bulos que lleguen a cuestionar inclusive la validez profesional de los títulos académicos cursaos nel CIFP.

    25/06/2026.

    Dende CCOO consideramos que nos atopamos ante un ataque frontal a la escuela pública y, en particular, a la Formación Profesional pública n’Asturies. Estes actuaciones nun solo cuestionen de manera reiterada ya ensin xustificación la llabor del profesoráu del CIFP del Mar, sinón que tán xenerando un grave dañu a la imaxe y credibilidá d’un centru que ye referente na formación náutico-pesquera.

    Les consecuencies d’esta campaña yá son visibles. El deterioru de la reputación del centru ta teniendo repercusiones negatives na matriculación, poniendo en riesgu la so estabilidá y el so futuru. Al empar, ta incrementándose de forma preocupante la presión sobre’l profesoráu, sometíu a un cuestionamientu sistemáticu de la so profesionalidá que resulta totalmente inaceptable.

    Dende Comisiones Obreres queremos espresar el nuesu respaldu al profesoráu del CIFP del Mar, cuya llabor y cualificación tán fuera midida. Nun vamos permitir que s’utilicen argumentos interesaos pa poner en cuestión el trabayu de quien cada día caltienen la calidá de la enseñanza pública n’Asturies.

    En CCOO preguntámonos qué intereses esisten detrás d’esta campaña de descréditu. Nun podemos obviar que’l debilitamientu d’un centru públicu como’l CIFP del Mar pue llevar de la mano el fortalecimientu de la Formación Profesional privada, y paez que ye esti, y non otros, l’interés que ta persiguiendo la derecha política y sindical n’Asturies.

    Por too ello, dende Comisiones Obreres esiximos respetu al profesoráu y al conxuntu de la comunidá educativa del CIFP del Mar, asina como el cese inmediatu d’estos ataques que namái contribúin a erosionar la confianza na escuela pública.