Sindicato de Enseñanza de CCOO de Asturias | 6 noviembre 2026.

Meyora de los derechos llaborales na enseñanza pública

El Sindicatu d’Enseñanza de CCOO fuerza la reapertura de les negociaciones y consigue meyorar la propuesta de reducción horaria pal profesoráu mayor de 55 años.

  • CCOO consigue reabrir el diálogu cola Conseyería y forza una meyora sustancial de la propuesta de reducción horaria pal profesoráu mayor de 55 años.
  • La nueva ufierta adelanta los plazos, amplía les reducciones previstes y amenorga les incompatibilidaes, anque'l sindicatu caltién que l'oxetivu tien de ser algamar dos hores llectives de reducción dende'l próximu cursu.

La propuesta treslladada güei pola Alministración propón una reducción d'una hora llectiva pal próximu cursu en tolos cuerpos docentes. La segunda hora amenorgarase nel tramu llectivu pal cuerpu de Maestros nel cursu 2028/29, ente que nesi mesmu cursu, pal restu de cuerpos, la segunda hora de reducción va tener calter complementariu. A partir del cursu 2029/30 tolos cuerpos docentes contaríen con dos hores llectives de reducción. El profesoráu mayor de 64 años dispondría d'una tercer hora de reducción a partir del cursu 2030/31.

15/10/2026.
Concentración por la reducción horaria para mayores de 55 años.

Concentración por la reducción horaria para mayores de 55 años.

El Sindicatu d'Enseñanza de Comisiones Obreres d'Asturies valora l'avance producíu nes negociaciones sobre la reducción horaria pal profesoráu mayor de 55 años, una reivindicación histórica del profesoráu asturianu y una midida imprescindible pa meyorar les condiciones llaborales de plantiyes cada vez más avieyaes.

Ente'l pasáu cursu y l'actual celebráronse un total de diez xuntes pa abordar la materialización d'esta midida n'Asturies. Dende'l primer momentu, CCOO treslladó una serie de principios irrenunciables pa que la reducción horaria tuviera una utilidá real pal profesoráu y nun quedara nuna simple operación cosmética.

Mientres tol procesu negociador, Comisiones Obreres defendió que les hores oxetu de reducción destinaren exclusivamente a xeres propies del personal docente; que la midida nun podía suponer una sobrecarga pal restu de compañeres y compañeros al traviés de la redistribución d'hores llectives; y que necesariamente tenía qu'ir acompañada de nueves contrataciones que contribuyeren a rexuvenecer unes plantiyes que s'atopen ente les más avieyaes del sistema educativu.

Sicasí, enantes del branu, la Conseyería d'Educación presentó una propuesta que s'alloñaba considerablemente d'estos plantegamientos. Tanto'l númberu d'hores de reducción previstu como'l calendariu d'implantación resultaben claramente insuficientes y taben bien lloñe de les espectatives xeneraes ente'l profesoráu asturianu.

CCOO refugó de planu esta propuesta y negóse a roblar un alcuerdu que considerábamos insuficiente. Sicasí, contó col sofitu d'otres organizaciones sindicales que yá taben dispuestes a roblar aquella propuesta, que, convien recordar, remataba'l desarrollu del alcuerdu en 2032.

Lloñe de dar por zarrada la negociación, CCOO siguió mientres los meses posteriores esixendo la reapertura del diálogu cola Alministración. Siempre defendimos qu'esistíu marxe pa meyorar la propuesta inicial y que la Conseyería tenía d'escuchar les demandes del profesoráu asturianu.

Fai apenas dos selmanes la Conseyería aceptó reabrir la negociación y estudió una nueva propuesta qu'incorpora meyores significatives respeuto al plantegamientu inicial. Ente elles, destaca la reducción del calendariu d'implantación previstu inicialmente, l'aumentu de les hores de reducción horaria y la disminución de los supuestos d'incompatibilidá que llindaben l'accesu a la midida.

Dende CCOO consideramos evidente que estes meyores son consecuencia directa de la oposición firme caltenida pola nuesa organización mientres tol procesu. Si güei esiste una propuesta meyor ye porque hubo quien se negó a conformase con una midida claramente insuficiente y siguió defendiendo les reivindicaciones del profesoráu cuando otros dieron por bonu'l primer plantegamientu de l'Alministración.

Sicasí, tamién queremos señalar que la propuesta actual sigue alloñada de la posición defendida por Comisiones Obreres. La nuesa organización sigue considerando que l'oxetivu tien de ser algamar una reducción de dos hores llectives pal profesoráu mayor de 55 años dende'l próximu cursu, tanto nel cuerpu de Maestros como nel de Secundaria y restantes cuerpos docentes.

Por ello, la valoración definitiva de CCOO nun va adoptase de manera unilateral. Fieles al nuesu modelu sindical participativu, treslladaremos la propuesta al conxuntu de la nuesa afiliación pa recoyer les sos opiniones y valorar el grau de satisfacción col testu plantegáu.

Los derechos del profesoráu consíguense negociando, pero tamién calteniendo posiciones firmes cuando les propuestes son insuficientes.