Sindicato de Enseñanza de CCOO de Asturias | 6 diciembre 2025.

CCOO Enseñanza Asturies esixe'l cese del equipu directivu del IES Roces tres el refugu frontal del claustru al so proyectu educativu

    La xunta de güei cola Dirección Xeneral de Personal Docente sirvió pa treslladar la necesidá urxente de destituyir a la dirección y recuperar la convivencia nun centru marcáu por un conflictu crónicu y un clima llaboral tóxicu.

    02/12/2025.
    Consejería de Educación de Asturias.

    Consejería de Educación de Asturias.

    Esta mañana tuvo llugar una xunta billateral de trabayu ente la Dirección Xeneral y representante de CCCO pa tratar, ente otros asuntos, la crítica situación que traviesa'l IES Roces de Xixón. Nesa xunta, el Sindicatu esixó formalmente la destitución inmediata del equipu directivu del centru como pasu indispensable pa restablecer un clima llaboral y educativo sanu y productivu.

    El IES Roces arrastra un conflictu permanente dende va siete años, una situación anómala y gravemente perxudicial pa la comunidá educativa. La gravedá del clima nel centru quedó de manifiestu'l pasáu cursu, cuando'l Serviciu de Prevención de Riesgos Llaborales viose obligáu a realizar un informe de riesgos psicosociales ante la evidencia d'un entornu de trabayu tóxicu.

    La solicitú de cese prodúzse tras un nuevu episodiu que demuestra la perda total de confianza y apoyu per parte del profesoráu. La selmana pasada, l'equipu directivu convocó un claustru estraordinariu pa someter a votación la continuidá del Proyectu Educativu del Centru. Esti fechu ye especialmente relevante porque, solo unos díes antes, nel Comité de Salú Llaboral de la Conseyería, la mesma dirección aseguraba cuntar col respaldu del 90% de la plantiya. El resultáu de la votación nel claustru foi un refugu mayoritariu al proyectu presentáu pola dirección. El profesoráu, de manera democrática, apoyó la NON continuidá del mesmu, desmintiendo rotundamente les declaraciones previes del equipu directivu y dexando clara la so falta d' apoyu y lideralgu efectivu.

    Ante esta situación, CCOO Enseñanza Asturies considera que la Conseyería d'Educacióna nun puede siguir tolerando'l deterioru constante d'un centru públicu. La estabilidá del profesoráu, el bienestar del alumnáu y la calidá de la enseñanza tán seriamente comprometíos. L'Alministración educativa tien la responsabilidá y l'obligación d'intervenir pa garantizar el derechu a una educación nun entornu afayadizu.

    Por too esto, tresllademos güei a la máxima autoridá en materia de personal docente la necesidá urxente d'un cambéu de dirección nel IES Roces. Ye'l primer y fundamental pasu pa entamar un procesu de reconciliación, pacificación y recuperación del normal funcionamientu del institutu. Confiamos en que la Conseyería actúe cola dilixencia y determinación qu'esta situación requier, priorizando l'interés de la comunidá educativa percima de cualesquier otra consideranción.

      •