Sindicato de Enseñanza de CCOO de Asturias | 13 febrero 2026.

Pautu Asturies Educa

CCOO Enseñanza Asturies aclara la incidencia na aplicación de la xubida salarial

  • Un error técnicu provocó que l’incrementu de 100 euros mensuales nun se reflexara correutamente nes nómines.

CCOO Enseñanza Asturies esplica la situación xenerada en rellación cola aplicación de la xubida salarial alcordada nel marcu del Pautu Asturies Educa, tres detectase un error técnicu que reduxo l’importe efectivamente percibíu pol profesoráu. El sindicatu treslladó esta incidencia a la Conseyería d’Educación y esixe que se corrixa a la mayor brevedá posible, garantizando’l cumplimientu íntegru del pactu y el so calter retroactivu.

26/01/2026.
Movilizaciones de la enseñanza pública asturiana.

Movilizaciones de la enseñanza pública asturiana.

El Sindicatu d’Enseñanza de CCOO Asturies quier aclarar la situación xenerada en rellación cola xubida salarial alcuerdada nel marcu del Pautu Asturies Educa, alcuerdu que permitió la desconvocatoria de la fuelga indefinida de la enseñanza pública asturiana nos meses de mayu y xunu de 2025.

D’esi pautu formaba parte una xubida salarial llinial de 100 euros mensuales, incorporada a la Llei de Presupuestos del Principáu d’Asturies, aprobada nel mes d’avientu. Nesi mesmu mes algamóse un alcuerdu estatal pol que’l Gobiernu de la Nación aprobó una xubida xeneral del 2,5 % pa toles emplegaes y emplegaos públicos.

Como consecuencia d’un error técnicu, les cuantíes correspondientes a la xubida autonómica calculáronse tomando como referencia la nómina de payares, y non la d’avientu, na que yá tenía d’incorporase l’incrementu estatal del 2,5 %. Esto provocó que na nómina de xineru figure una xubida de 100 euros respeuto a payares y non respeuto a avientu, lo que amenorga la xubida real alredor de 85 euros mensuales.

Na tarde de güei, la Conseyería d’Educación reuniose coles organizaciones sindicales firmantes del alcuerdu y aseguró que taba trabayando nuna fórmula pa correxir esti error a la mayor brevedá posible, de mou que se garantice’l cumplimientu íntegru de lo pactao y el so calter retroactivu dende’l 1 de xineru de 2026.

Ye importante señalar que’l capítulu de gastos de personal de la Llei de Presupuestos foi sometíu a la consideración de la Mesa de Negociación, ensin que nin la parte sindical nin la propia Alministración detectaren esti error, incluyíos los sindicatos non firmantes del alcuerdu.

Dende CCOO Enseñanza Asturies llamentamos fondamente esta situación y pidimos disculpes al profesoráu por nun haber advertío esti problema enantes del so reflexu efectivu nes nómines.

CCOO reafirma’l so compromisu cola defensa de los derechos salariales y llaborales del profesoráu y va siguir vixilante pa que los alcuerdos firmaos se cumplan na so integridá, ensin menoscabru dalgunu pa les trabayadores y trabayadores de la enseñanza pública asturiana.