Sindicato de Enseñanza de CCOO de Asturias | 28 febrero 2026.

CCOO denuncia la precarización de l' Atención Temprana n’Asturies: un serviciu esencial parcialmente privatizáu y sometíu a la austeridá

    CCOO, sindicatu mayoritariu del sector, esixe’l reconocimientu profesional del personal de les Unidaes d’Atención Temprana esternalizaes y reclama una xunta urxente cola Dirección Xeneral d’Infancia y Families.

    27/02/2026.
    Actividad manipulativa en una sesión de Atención Temprana.

    Actividad manipulativa en una sesión de Atención Temprana.

    El Sindicatu d’Enseñanza de CCOO d’Asturies denuncia la situación que tán travesando les Unidaes d’Atención Infantil Temprana nel Principáu, un serviciu esencial dirixíu a población infantil especialmente desvalío que, de mou paradóxicu, namás se xestiona de manera direuta pol Gobiernu asturianu n’Uviéu y Xixón, quedando privatizáu nel restu d’Asturies.

    L' Atención Temprana ye una intervención d’alta complexidá téunica, d’enfotu interdisciplinar, destinada a neñes y neños ente 0 y 6 años que presenten indicadores d’alteraciones nel neurodesarrollu o factores de riesgu. Trátase d’una xera d’enorme responsabilidá profesional, que requier alta cualificación téunica, esperiencia específica y una intervención rigurosa y coordinada.

    Sicasí, la mayor parte d’estes unidaes n’Asturies —tanto xeneralistes como específiques, col esceición de les allugaes en Xixón y Uviéu— tán esternalizaes a empreses privaes y entidaes que llogren la so xestión per aciu de llicitación pública, onde’l coste del serviciu conviértese nun criteriu determinante d’axudicación. Esti modelu introduce una lloxística d’austeridá presupuestaria n’un ámbitu que tendría de rexise esclusivamente por criterios de calidá asistencial y estabilidá profesional.

    Dende CCOO Enseñanza reclámase que l’Alministración autonómica reconoza de manera oportuna la capacitación y especialización del personal que trabaya nestes unidaes, asemeyando les sos condiciones al nivel de responsabilidá qu'asumen y a les esixencies téuniques del serviciu. En concretu, el sindicatu plantea:

    • La integración del personal nel Nivel 3 (Grao más Máster).
    • Establecer un complementu autonómicu específicu.
    • L’accesu a formación especializada promovida y financiada pola propia Alministración.

    El sindicatu considera que dignificar les condiciones llaborales nun ye solo una cuestión de xusticia profesional, sinon una garantía direuta de calidá y estabilidá n’un serviciu públicu esencial pa la infancia y les families.

    Amás, CCOO denuncia la falta de diálogu por parte de la Conseyería competente. El sindicatu solicitó en delles ocasiones una xunta cola Dirección Xeneral d’Infancia y Families, ensin recibir respuesta hasta’l momentu. La necesidá d’esti alcuentru ye entá más evidente tres los graves errores detectaos nel caberu pliegu d’axudicación, que foi impugnáu por CCOO y que la propia Conseyería viose forciada a correxir.

    Por too ello, CCOO insiste na so esixencia d’una xunta urxente cola Directora Xeneral d’Infancia y Families pa tratar de mou direutu la situación del personal d’Atención Temprana y garantizar que les sos reivindicaciones queden recoyíes nos próximos pliegos de llicitación.

    L' Atención Temprana nun pue tratase como un serviciu secundariu nin xestionase baxo parámetros d’aforru económicu. Ye un pilar fundamental del sistema públicu de protección a la infancia y tien de cuntar col reconocimientu profesional, estabilidá y financiación abonda pa cumplir la so función social.