Sindicato de Enseñanza de CCOO de Asturias | 16 julio 2026.

Enseñanza de la llingua asturiana

CCOO celebra l'anunciu de la creación de la especialidá docente de Llingua Asturiana y esixe que se faiga realidá cuanto primero

  • CCOO esixe que'l Ministeriu concrete'l calendariu d'aprobación pa evitar retrasos nuna midida de xusticia llaboral y educativa.

El sindicatu destaca que se pon fin a más de cuatro décades d'una situación de precariedá ya inseguridá llaboral pa cerca de 400 docentes y reclama que la tramitación s'axilice al máximu.

09/07/2026.
Docentes durante el encierro reivindicativo del 4 de mayo del presente curso.

Docentes durante el encierro reivindicativo del 4 de mayo del presente curso.

El Sindicatu d'Enseñanza de CCOO d'Asturies amosó güei la so satisfacción pol anunciu realizáu pol Ministeriu d'Educación sobre la creación de la especialidá docente de Llingua Asturiana, una reivindicación histórica del profesoráu y de la organización sindical que va permitir correxir una anomalía que se prollonga dende va más de cuarenta años.

Dende l'entamu de les enseñances de Llingua Asturiana, el profesoráu desempeñó la so xera nuna situación esceicional dientro del sistema educativu: ensin una especialidá docente propia y, polo tanto, ensin posibilidá d'acceder a la condición de personal funcionariu de carrera al traviés de los procedimientos ordinarios d'accesu a la función pública. Esta circunstancia condenó mientres décades a centenares de profesionales a una situación d'inestabilidá y precariedá llaboral.

CCOO recuerda que la creación d'esta especialidá formó parte de les sos reivindicaciones permanentes y que, mientres la negociación que permitió poner fin a la histórica fuelga educativa del cursu pasáu n'Asturies, llogró incorporar al Pactu Asturias Educa'l compromisu del Gobiernu del Principáu de solicitar formalmente al Ministeriu d'Educación la creación de la especialidá docente de Llingua Asturiana.

El sindicatu considera que l'anunciu del Ministeriu supón un pasu decisivu pa reconocer dafechu estes enseñances y dignificar les condiciones llaborales d'un colectivu que lleva décades calteniendo una parte esencial del patrimoniu llingüísticu y cultural d'Asturies.

Sicasí, CCOO alvierte de que l'anunciu tien de treslladase a fechos cola mayor rapidez posible. La organización reclama al Ministeriu que concrete de manera inmediata'l calendariu de tramitación y axilice tolos procedimientos necesarios pa que la especialidá pueda entrar en vigor cuanto primero.

La organización sindical sorraya que'l contestu políticu actual obliga a amenorgar al máximu los plazos d'aprobación pa evitar que una eventual inestabilidá institucional retrase una midida llargamente esperada pol profesoráu.

La creación de la especialidá va permitir que alredor de 400 docentes puedan algamar progresivamente a puestos de trabayu estables, con plenes garantías xurídiques y profesionales, equiparando por fin los sos derechos colos del restu del profesoráu del sistema educativu.

Pa CCOO, esti avance constitúi una cuestión de xusticia llaboral y de calidá educativa, al dotar d'estabilidá a un colectivu imprescindible pa la enseñanza, la promoción y la normalización de la llingua asturiana nos centros educativos del Principáu.