Sindicato de Enseñanza de CCOO de Asturias | 15 octubre 2026.

El Sindicatu d'Enseñanza de CCOO Asturies denuncia que namái'l 7% de les docentes embarazaes que son interines lleguen a llograr el permisu por riesgu mientres l'embarazu

    El sindicatu denuncia que'l 93% de les docentes interines embarazaes vense obligaes a solicitar la baxa médica polos retrasos na concesión del permisu por riesgu, frente al 40% de les funcionaries de carrera que sí lu llogren. Pa CCOO, trátase d'una forma más de violencia estructural escontra les trabayadores pol fechu de ser muyeres.

    14/10/2026.

    Na mañana de güei, miércoles 14 d'ochobre de 2026, tuvo llugar una xunta estraordinaria de los Comités de Salú Llaboral y Prevención de la Conseyería d'Educación tres la solicitú de CCOOde CCOO, tres detectar el sindicatu nos dos últimos cursos un retrasu xeneralizáu na concesión de los permisos llaborales en casu d'embarazu.

    Por exemplu, si hasta hai poco una maestra de PT d'un centru d'educación especial recibía la "baxa" llaboral na selmana 24 de xestación, anguaño tán recibiéndola n'algunos casos na selmana 36 o 37. CCOO tuvo conocencia d'un casu d'una docente que, a puntu de llegar a la selmana 38, siguía en serviciu activu.

    El departamentu de Salú Llaboral de la Conseyería d'Educación espunxo los datos del cursu actual, nel que 28 docentes interines activaron el protocolu de salú llaboral que da llugar a la concesión d'un permisu en función de los riesgos acomuñaos al so puestu de trabayu. D'estes 28 docentes, namái'l 7% llogró finalmente'l permisu llaboral, ente que'l restu tuvieron que solicitar la baxa médica por enfermedá común debido a los retrasos y dificultaes na concesión que pon la mutua contratada pol Gobiernu Asturianu pal so personal.

    Nel casu de les funcionaries de carrera, que los sos permisos nun dependen d'una mutua, sinón que son xestionaos direutamente pola Alministración, tramitáronse esti cursu 38 protocolos, asitiándose nel 40% el porcentaxe de docentes embarazaes que llogren el permisu por riesgos acomuñaos al puestu de trabayu, una diferencia que pon de manifiestu la discriminación que sufren les trabayadores interines, asistíes por una mutua.

    Pal sindicatu, esta situación constituye "un escándalu" que nun tien cabida en 2026.

    Retrasos que obliguen a trabayar más allá de la selmana 37.

    Esta denuncia súmase a la presentada por CCOO ante los Comités de Seguridá y Salú Llaboral de la Conseyería d'Educación hai delles selmanes, na que, como diciemos, el sindicatu alertaba de que docentes embarazaes tán trabayando más allá de la selmana 37 de xestación en puestos de riesgu, debido a los retrasos nel reconocimientu de la prestación por riesgu mientres l'embarazu.

    El sindicatu señala que ente los casos detectaos hai docentes que trabayen con alumnáu con necesidaes educatives especiales y trastornos graves de conducta, espuestes a posibles agresiones físiques. La situación ye especialmente grave pa les trabayadores interines, pos cuando cambien de centru, la mutua nun siempres acepta l'informe d'evaluación de riesgos del cursu anterior y esixe unu nuevu, lo que retrasa la protección. Yá se detectaron dellos casos d'interines que superaron la selmana 37 trabayando.

    El sindicatu esixe a la Conseyería d'Educación una intervención inmediata, criterios homoxéneos y garantizar que nenguna docente embarazada siga trabayando en condiciones de riesgu por retrasos alministrativos, independientemente de la so situación llaboral. Pa CCOO, la protección de la maternidá frente a los riesgos llaborales ye un derechu y tien d'aplicase con independencia de la situación alministrativa de la trabayadora.