Sindicato de Enseñanza de CCOO de Asturias | 18 noviembre 2026.

CCOO espera que'l Conseyu d'Estáu dea mañana'l caberu pasu pa la creación de les especialidaes docentes de llingua asturiana y gallego-asturianu

    CCOO Enseñanza d'Asturies espera que mañana, xueves 19 de payares, el Conseyu d'Estáu apruebe'l dictame sobre'l proyeutu de modificación de los reales decretos que regulen les especialidaes de los cuerpos docentes, un trámite decisivu pa facer posible la creación de les especialidaes de llingua asturiana y gallego-asturianu.

    18/11/2026.

    Según el calendariu previstu pa la tramitación d'esta normativa, el proyeutu llegará'l próximu martes, 24 de payares, al Conseyu de Ministros pa la so aprobación definitiva como Real Decretu. Trataríase del últimu Conseyu de Ministros d'esta llexislatura, lo que permitiría culminar el procedimientu enantes de les eleiciones xenerales del 29 de payares y cumplir los plazos previstos pa facer realidá esta reivindicación histórica.

    Pa CCOO Enseñanza d'Asturies, la culminación d'esti procesu supondría un avance históricu pal reconocimientu profesional de quien imparte estes llingües y un pasu fundamental pa poner fin a una situación de precariedá llaboral que s'allarga dende va más de 40 años y qu'afecta a más de 300 docentes n'Asturies.

    El sindicatu recuerda qu'estos profesionales lleven décades desenvolviendo'l so trabayu en condiciones de desigualdá respectu al restu del profesoráu: contratos temporales de duración llimitada, xornaes parciales, cambeos de centru cada cursu y ausencia d'una vía específica d'accesu a places como funcionarios de carrera. Una situación que torgó garantizar la estabilidá de les plantiyes y el reconocimientu profesional d'un colectivu esencial pa la enseñanza y la tresmisión de les nueses llingües.

    La modificación de los reales decretos estatales permitirá que les comunidaes autónomes con llingües non oficiales que cuenten con protección llegal puedan crear les sos propies especialidaes docentes. Nel casu d'Asturies, abrirá la puerta al desarrollu de les especialidaes de llingua asturiana y gallego-asturianu nos cuerpos de Maestros, Enseñanza Secundaria y Escueles Oficiales d'Idiomes.

    CCOO recuerda qu'esti procedimientu foi superando los distintos trámites alministrativos previstos. El pasáu 3 de payares, el Conseyu Escolar del Estáu emitió un dictame favorable a la propuesta del Ministeriu d'Educación, ensin incorporar nenguna enmienda, respaldando asina de manera íntegra la modificación normativa plantegada.

    Dempués de más de cuatro décades de reivindicación, tamos a les puertes de consiguir un reconocimientu que nunca debió retrasase tanto.

    El Secretariu Xeneral de CCOO Enseñanza d'Asturies, que foi l'únicu representante sindical qu'asistió presencialmente a la negociación nel Ministeriu d'Educación en Madrid el mes pasáu, señaló que «confía en que se cumpla'l calendariu previstu y que'l próximu martes el Conseyu de Ministros dea lluz verde definitiva a esta modificación normativa. Sería un pasu decisivu pa saldar una delda histórica col profesoráu de llingua asturiana y gallego-asturianu y pa avanzar na dignificación del so trabayu».