Sindicato de Enseñanza de CCOO de Asturias | 27 junio 2026.

Formación Profesional n’Asturies

CCOO denuncia la supresión de ciclos formativos d'informática n'Avilés y Xixón y esixe la so recuperación inmediata.

  • CCOO alvierte del tresvase d’ufierta escontra la rede concertada y d’un nuevu avance na privatización de la FP

El Sindicatu d’Enseñu de Comisiones Obreres d’Asturies espresa’l so refugu ante la intención de la Conseyería d’Educación de suprimir dellos ciclos de Formación Profesional de la familia d’Informática en centros públicos d’Avilés y Xixón.

17/06/2026.
Aula de informática.

Aula de informática.

Esta midida, que ta plantegandose a finales de cursu y ensin ser comunicada oficialmente nin a les organizaciones sindicales nin al profesoráu afeutáu, supón un nuevu ataque a la planificación educativa y a la calidá de la enseñanza pública.

Según les informaciones treslladaes al sindicatu por docentes de los centros afeutaos, los argumentos utilizaos pola Conseyería taríen rellacionaos col avance de la intelixencia artificial y coles dificultaes pa atopar empreses nes que l’alumnáu de primer cursu pueda desarrollar la so formación n’entornos llaborales. Dende CCOO consideramos que estos motivos, per un llau, nun tienen nengún fundamentu real y, per otru llau, ponen de manifiestu les deficiencies del nuevu modelu de la Formación Profesional y les consecuencies nos recortes de les hores destinaes a les tutoríes y, polo tanto, a la busca d’empreses pal alumnáu.

Resulta especialmente grave y inaceptable que, ente que se plantea la eliminación d’estos ciclos en centros públicos, se caltengan les mesmes enseñances en centros concertaos, como asocede en La Pola.

CCOO yá denunció nel informe ellaboráu sobre l’avance de la privatización de la FP n’Asturies el tresvase progresivu d’ufierta educativa dende la rede pública escontra la privada. Los recortes na ufierta de ciclos formativos acordaos pol Gobiernu del Principáu d’Asturies reafírmannos nes nueses denuncies sobre’l desmantelamientu de la Formación Profesional pública.

Dende CCOO venimos alertando dende l’entamu de cursu de les dificultaes derivaes de la implantación de la nueva Llei de Formación Profesional n’Asturies, asina como del impautu negativu de midíes como’l recorte de les hores de tutoría, ensin obtener respuestes positives per parte de la Dirección Xeneral de Formación Profesional. Estes decisiones tán xenerando serios problemes organizativos y suponen un recorte encubiertu de puestos de trabayu.

Asimesmu, dende CCOO solicitamos hai unos meses la creación d’un Comité de siguimientu y evaluación de l’aplicación de la nueva Llei de FP, formáu por representantes de la Conseyería y de les organizaciones sindicales. Esta propuesta, empobinada a meyorar la implantación del nuevu modelu y a anticipar posibles problemes, foi refugada pola Conseyería d’Educación.

 

Enlaces relacionados

Lee la noticia en asturiano.

Enlaces relacionados

Lee la noticia en asturiano.